DEG DEG: Dagaal culus ayaa ka socda degmada Deyniile,
Dagaal xoogan ayaa haatan ka socda degmada Deyniile ee magaalada Muqdisho, kaas oo u dhaxeeya ciidamada dowladda federaalka iyo dad shacab ah oo ka gadooday amar dowladeed oo lagu farayay in ay ka guuraan dhul ay degganaayeen muddo dheer.
Wararka hordhaca ah ayaa sheegaya in shacabka deegaanka ay si cad u diideen in ay ka guuraan dhulkaasi, iyagoo sheegay in aysan diyaar u ahayn in la barakiciyo, ayna diyaar u yihiin in ay nafahooda ku waayaan halkooda. Dadka deegaanka ayaa dowladda Madaxweyne Xasan Sheekh ku eedeeyay inay ku hawlan tahay dhul boob baahsan oo shacabka looga rarayo si loo siiyo dad gaar ah.
Goob-joogayaal ayaa xaqiijiyay in rasaas culus la isku adeegsanayo, islamarkaana ay jiraan khasaarooyin isugu jira dhimasho iyo dhaawac oo soo gaaray dadka shacabka iyo ciidamada dowladda labadaba. Dhaqdhaqaaqyada ciidanka iyo cabashada shacabka ayaa sii hurinaya xiisadda, iyadoo xaaladdu ay tahay mid aad u kacsan.
Dadka deegaanka ayaa dalbanaya in la joojiyo xoog ku rarista shacabka, loona maro waddo sharci iyo wadahadal ah si loo xalliyo muranka dhuleed ee taagan.