Weeraryahanka reer France ee Anthony Martial ayay uga dhamaatay Manchester United, kaddib dhaawac culus oo soo gaadhay oo sababay in lagu sameeyo qalliin, sida ay shaacisay kooxdiisa Red Devils oo war-saxaafadeed soo saartay.
Martial ayaa lagaga sameeyey qalliin muruqa sarcanta, waxaana uu 28 jirkani jiifi doonaa muddo saddex illaa afar bilood ah, taas oo ka dhigan in aanu fursad u haysanin in uu dib ugu soo laabto kooxdiisa inta ka hadhay xilli-ciyaareedkan.
Weeraryahankan oo qandaraaskiisa Manchester United uu ku egyahay dhamaadka xilli-ciyaareedkan, isla markaana la filayo in aan loo cusboonaysiin doonin ayaa hore uga maqnaa kooxdiisa lixdii toddobaad ee ugu dambeeyey, waxaana markii hore la sheegay inuu xanuunsanayo, halka wakiilkiisu uu toddobaadkii hore xaqiijiyey in qalliin lagu samayn doono.
Warbaahinta Ingiriiska ayaa sheegaysa, in ay suurtogal tahay, in Anthony Martial uu taam u noqon doono ciyaarta Chelsea ee April 1, laakiin warar kale ayaa tibaaxaya in ay aad u adag tahay in laacibkani uu kusoo laabto garoomada waqtigaas marka la eego xaaladdiisa jidheed iyo dhaawacyada uu deriska la ahaa sannadihii ugu dambeeyey.
United ayaa haysata dookh hal sano ah oo ay ku kordhin karayso qandaraaska Anthony Martial, laakiin saddexdii sannadood ee ugu dambeeyey oo ay ciyaartiisa hoos u rideen dhaawacyo ayaa ku qasbay kooxda in ay iska dirto laacibkan.
Martial ayaa 19 gool oo kaliya u dhaliyey Manchester United tan iyo bilowga xilli-ciyaareedkii 2019-20, halka 62 kulan oo dhamaan tartamada ah oo xilli-ciyaareedkii tegay ay dheeshay United uu kaliya kasoo muuqday 28 ka mid ah.
Sannadkii 2015 ayay Manchester United kaga soo iibsatay Anthony Martial kooxda Monaco lacag dhan Β£36 milyan oo Gini, waxayse lacagtaasi markii dambe gaadhay Β£58 milyan oo Gini.