Ciidanka Qaranka iyo Xoogagga Degaanka oo Dagaal Culus Ku Hareereeyay Degmada Aadan Yabaal ee Gobolka Shabeellaha Dhexe
Ciidanka Xoogga Dalka Soomaaliyeed iyo Xoogagga Degaanka Gobolka Hiiraan ayaa dagaal culus ku hareereeyay Degmada Aadan Yabaal ee Gobolka Shabeellaha Dhexe, iyagoo maalintii labaad si xiriir ah u wajahaya kooxda argagixisada ah ee Alshabaab.
Dagaalka oo si isdaba joog ah u socday ayaa horseeday in kooxda laga saaro goobo muhiim ah oo ay horey ugu sugnaayeen, waxaana haatan dagaalku si gaar ah uga socdaa aagga garoonka diyaaradaha magaalada Aadan Yabaal, taas oo muujineysa in kooxda si weyn looga durjiyay fariisimahoodii hore.
Kooxda argagixisada ah ayaa la kulantay khasaare lixaad leh, waxaana xoogagga degaanku ay dagaalka u galayaan si ay u difaacaan deegaannadooda, una xaqiijiyaan nabad iyo xasillooni waarta.
Dhinaca kale, Madaxweynaha Dowladda Hirshabeelle, Mudane Cali Guudlaawe Xuseen, oo ku sugan furimaha dagaalka ee Gobolka Shabeellaha Dhexe, ayaa bogaadiyay halganka ay hormuudka ka yihiin xoogagga Hiiraan, isagoo guul wax-ku-ool ah ku tilmaamay dadaalka socda.
Sidoo kale, abaabul xooggan oo ay wadaan shacabka deegaannada hoos yimaada Wargaadhi iyo deegaannada xeebaha Gobolka Shabeellaha Dhexe ayaa sare u qaaday taageerada dagaalka lagula jiro kooxda argagixisada.