Koox hubeysan oon wali heybtooda la garan, ayaa xalay saqdii dhaxe magaalada Garowe ee caasimadda Puntland waxa ay ku dileen labo qof oo shacab ah, waxaana dilka kaddib goobta degdeg uga baxsaday kooxdii dilka geesatay.
Laamaha amniga magaalda Gorowe, ayaa laga soo xigtay in falkan dilka ah uu dhacay xalay xilli badi dadka hurdeen, waxaana labada nin ee la dilay oo midkood waardiye ahaa ay ku sugnaayeen afaafka hore ee hotelka Baashe ee kuyaalla bartaha Garowe.
Ciidamada booliiska ee ka howlgala magaalada Garowe, ayaa bilaabay baaritaanno ku aadan falkan dilka ah ee xalay ka dhacay magaalada, waxa ayna saraakiisha ciidamada sheegeen in ay ku daba jiraan ogaanshiyaha iyo soo qabashada dableyda dilka geesatay.
Falkan dilka ah ee xalay ka dhacay magaalada Garowe, gaar ahaan meel amaankeeda aad loo adkeeyo ayaa waxaa aad uga naxay shacabka magaalada , waxa ayna ku baaqeen in ciidamada tallaabo ka qaadaan kooxdii dilka ka dambeysay iyo kooxaha kale ee falalka amaan daro geesta.
Amaanka magaalada Garowe, ayaa mudooyinkii lasoo dhaafay ahaa mid aad u wannaagsan, waxaana mararka qaar xilliyada habeenkii dhaca dhibaatooyinka ay geestaan dabley hubeysan oo la sheegay in ay cabsan yihiin khamri iyo xashiish