Xildhibaanno ka tirsan baarlamaanka Soomaaliya ayaa magaalada Muqdisho uga dhowaaqay kudlad cusub.
Kudladaan cusub oo lagu magacaabo “Kudlada Midnimo Qaran” ayaa Xildhibaannada ku midoobay waxay sheegeen in ujeedkooda uu yahay in ay ka shaqeeyaan midnimada bulshada Soomaaliyeed.
“Koox dhalinyaro ah iyo rag rug cadaa ah oo odayaal ah ayaa iskugu jira. Kudlada waxay ka shaqeyn doonta midnimada umadda Soomaaliyeed maadaama aan baarlamaanka ku metelno,” ayuu yiri Xildhibaan Jeeg oo kamid ah Xildhibaannada ku dhowaaqay kudladaan.
Waxa uu intaas kusii daray “Waxaa ka shaqeyn doona dalkaan badbaadintiisa iyo daryeelkiisa haddii ay tahay la-dagaalanka Khawaarijta iyo wax walba oo dhibaato ku ah dalkaan.”
Sidoo kale waxa uu xildhibaanka sheegay in dhismaha kudladaan ay ka maran tahay aragti siyaasadeed oo mucaarad ama muxaafid, balse ay ku timid aragti ka duwan kuwii hore u jiray, islamarkaana ay tahay mid go’aansatay inay ka shaqeyso midnimada umadda Soomaaliyeed.
“Kudlad mucaarad ama muxaafid iyo cid gaar ah meel u joogta ma ahan. Waana in madaxda dalka noo arkin caqabad, sidoo kalena mucaaradka dalka jooga caqabada oo waxaan annaga ka shaqeyn doona anaga midnimada umadda Soomaaliyeed.”
Afhayeenka u hadlay kudladaan ayaa ugu dambeyntiina waxa uu sheegay in qaab dhismeedka kudladaan ay dhawaan la wadaagi doonaan bulshada, isaga oo meeshana ka saaray in kudlan cusub ay daba ku hayso aragti mucaarad ama muxaafid ah, taasi oo iska soo bixi doonta mustaqbalka dhow.
Si kastaba, arrintaan ayaa imaaneysa xilli ay taagan tahay xiisad ka dhalatay wax ka beddelka dastuurka, ayada oo weli dowladda madaxweyne Xasan Sheekh ay ku adkeysaneyso wax ka beddelka ay rabto, ayada oo maalmihii u dambeeyayna ay doodda wax ka beddelka dastuurka ka socoto baarlamaanka.
https://fb.watch/qM9iGG3XE9/