Ciidanka Israaiil ayaa laga diiwaangeliyay tacadiyo kala duwan oo ay ka gaysteen dhulka Falastiin, warbixinnadii ugu dambeeyay ee laga daabacay waxaa kamid ahaa in Askarta Yuhuudda ay jirdil xooggan u gaysteen Dad rayid ah oo qaarkood ay ka qabteen Daanta-galbeed.
Qaar kamid ah Dadka ay dhibaatadu u gaysteen militariga Israaiil ayaa sheegay in ciqaab darran la marsiin jiray muddadii ay gacanta ugu jireen ciidamada cadawga ah ee Yuhuudda waxaana ay tilmaameen in muddo u dhaxaysa 30 cisho ilaa 50 maalmood gacanta ay ugu jireen ciidamadaan.
Xubnaha u dooda xuquuqda aadanaha ayaa sheegay in qaarkood Dadkaan uu ka muuqdo jirdilka arxan-darrada ah ee Ciidanka Yuhuuddu u gaysteen Dadkaan rayidka ah ee gacanta u galay iyaga oo qaraarsan guuldarrada Militari ee ay kala kulmeen furimaha Dagaalka oo ay isku hor fadhiyeen kooxaha wax iska caabbinta.
Dadka la dhibaateeyay ayaa qaarkood waxa ay Warbaahinta la wadaageen dhibaatooyinka ay u gaysteen ciidamada Yuhuudda waxaana ay sheegeen in ay diyaar u yihiin dacwad ay la daba-kacaan inkasta oo ay tilmaameen in aanay u muuqan sharci ama xeer qabanaya si ay magdhow u helaan Dadkaas.
Ciidamada Israaiil ayaa horay u faafiyay muuqaallo ay ka duubeen Koox rag ah oo indhaha ay ka xireen iyaga oo feero-qaawan oo keliya wata Buumo (Hoos gashi), qaar kamid ah Dadkaas ayaa sheegay in xitaa Miino & kaamirooyin ay ku xireen isla markaana si awood ah u geliyeen Godadka ay ku tuhmayaan in ay ku sugan yihiin Xamaas.