War-saxaafadeed ka soo baxay Howlgalka Midowga Afrika ee Taageerada iyo Xasilinta Soomaaliya AUSSOM ayaa looga hadlay dagaalkii cuslaa ee Jimcihii ka dhacay gudaha deegaannada Sabiib iyo Caanoole ee gobolka Shabeelaha Hoose.
Howlgalka ayaa sheegay in ay ka hortageen weerarkaasi oo qaraxyo ku billaawday, isla markaasna ay weli gacanta ku hayaan deegaannadii lagu dagaalamay ee gobolka Shabeelaha Hoose.
AUSSOM ayaa caddeysay in weli ay socdaan howlgallada ka dhanka ah AS ee lagu xaqiijinayo amniga guud ee deegaannada Sabiib iyo Caanoole, iyaga oo kaashanaya Ciidanka Xoogga.
“Waxaan wadnaa howlgallo lagu xaqiijinayo Amniga guud ee Sabiib iyo Caanoole, AS waxaan ka dilnay xubno badan, hubna waan ka qabsanay” ayaa lagu yiri Bayaanka AUSSOM.
Bayaanka Howlgalka ayaa sidoo kale lagu xusay in ay billaabayaan howlgallo guud oo AS looga saarayo dhammaan deegaannada ay kaga sugan yihiin gobolka Shabeellaha Hoose.
Dhinaca kale, Dowladda Federaalka Soomaaliya ayaa sheegtay in la iska difaacay weerarka AS ee deegaannada Sabiib iyo Caanoole, isla markaasna amniga la xaqiijinayo.
Khasaare isugu jira dhimasho iyo dhaawac ayaa ka dhashay dagaalka ka dhacay deegaannadaasi, inkasta oo aan si madaxbanaan loo xaqiijin karin tirada rasmiga ah.