Ciidamo katirsan booliiska Soomaaliya, gaar ahaan kuwa sida gaarka ah u tababaran ee Haramcad , ayaa rasaas xooggan ku kala eryay dad shacab ah oo bannaanbax ka dhigayay magaalada Muqdisho, gaar ahaan aaragada degmada Dayniile.
Dadka dibadbaxa dhigayay, ayaa si weyn uga soo horjeeday dhul boob la sheegay in xaafadahooda lala damacsan yahay, waxa ayna shacabka shalay ilaa maanta dhigayeen dibadbaxyo ay ku diidan yihiin in dhulkooda la boobo ama laga qaato lacago baad ah.
Masuuliyiin katirsan maamulka degmada Dayniile iyo saraakiil ciidan oo u tagay shacabka dibadbaxa dhigaya , ayaa ku guuldareestay in dadka ku qanciyaan in ay kala tagaan, shacabka ayaana dhagxaan kala hortagay masuuliyiintii iyo saraakiishii tagtay goobta dibadbaxa ka socday.
Ciidamo katirsan booliiska sida gaarka ah u tababaran ee Haramcad , ayaa tagay goobta uu ka socday bannaanbaxa, waxa ayna rasaas ku kala eryeen dadkii halkaasi dibadbaxa ka dhigayay, waxaana lasoo sheegayaa in rasaasta ka dhalatay khasaaro dhaawac ah.
Dadka dibadbaxa dhigaya, ayaana la sheegay in ay ka kacdoomeen kaddib markii guryahooda lagu buufiyay calaamad dumis ah, waxa ayna dadkan sheegayaan in ay heestaan dukumiintiyo sax ah ay ku iibsadaan dhulka ay degan yihiin oo asalkooda goof ahaa.