Madaxweynaha Mareykanka Donald Trump ayaa amar ku bixiyay in magaalada Los Angeles loo diro 2,000 oo askari oo ah Ciidanka Ilaalada Qaranka, si ay uga qeyb qaataan xakameynta rabshado ka dhacay halkaas kaddib markii ICE ay qaaday howlgal ballaaran oo lagu beegsanayay muhaajiriinta aan sharciga haysan.
Rabshadahan ayaa ka bilaawday carada ka dhalatay xarigga dad badan oo Latin Ameerikaan ah ah oo lagu qabtay xaafadda Paramount ee magaalada Los Angeles .
Tallaabadan ayaa imaneysa iyadoo ay sii xoogeysanayaan mudaharaadyo ay dhigayaan dadka deegaanka, kuwaasoo ka dhiidhinaya sida ICE u fulinayso howlgallada.
Guddoomiyaha gobolka California, Gavin Newsom, iyo duqa magaalada Los Angeles, Karen Bass, ayaa si adag u cambaareeyay tallaabada Trump, iyagoo ku tilmaamay “mid xaaladda kicineysa” oo aan xal u keeneyn bulshada.
Dhanka kale, Taliska ICE iyo masuuliyiin ka tirsan xukuumadda Trump ayaa difaacay howlgalka socda, iyagoo ku andacoonaya in la qabanayo “dambiilayaal sharciga baal maray” oo khatar ku ah amniga Mareykanka.
Bulshooyinka Latino-ga ah ee ku nool xaafadda Paramount ayaa sheegaya inay dareemayaan cabsi iyo cadaadis, iyadoo qaar badan oo ka mid ah dadkaas aysan hadda ka baqayaan inay bannaanka u baxaan.
Kooxaha u dooda xuquuqda aadanaha ayaa sheegay in howlgalladan ay kala jarayaan qoysas isla markaana dhaawacayaan xiriirka bulshada iyo dowladda.
Khilaafka u dhexeeya maamulka Trump iyo hogaamiyeyaasha gobolka California ayaa markale banaanka keenay loollanka siyaasadeed ee ku saabsan socdaalka, amniga gudaha, iyo awoodda dowladda dhexe marka loo eego tan gobollada.