Xaaladda degmada Doolow ayaa saaka degan, kadib dagaallo culus oo xalay ka dhacay, kuwaasoo u dhaxeeyay ciidamada Nabadsugidda Federaalka iyo ciidamada Itoobiya oo la sheegay in ay weerar kusoo qaadeen xerada ay ku sugnaayeen ciidanka Nabadsugida.
Wararka qaar ayaa sheegaya in ciidamada Itoobiya gubeen hub iyo saanad ciidan oo yaallay xarunta Ciidamada Nabadsugida, waxaana wararku intaa ku darayaan inay gebi ahaanba Ciidamada Itoobiya la wareegeen xerada, gacantana ku dhigeen Taliyihii ciidanka Nabadusgida ee Doolow iyo qaar ka mid ah ciidanka Nabadsugida.
Sidoo kale, xaaladda magaalada Baladxaawo ayaa saaka degan oo maalmihii la soo dhaafay ay dagaalo ka dhacayeen, kaddib markii uu halkaas si lama filaan ah maalmo ka hor uga degay C/rashiid Janan oo loo magacaabay Taliyaha Nabadsugida Jubbaland ahna Madaxa Guud ee Amniga gobolka Gedo.
Xiisaddan dagaal ee ay ku lug yeesheen Ciidanka Itoobiya ayaa ku soo aadday, iyadoo magaalada Addis Ababa uu ku sugan yahay Madaxweyne Xasan Sheekh iyo Taliyaha Nabadsugida iyo Sirdoonka Qaranka Mahad Salaad, mana jirto illaa hadda war rasmi ah oo ka soo baxay dowladda Federaalka oo ku saabsan dagaalkii xalay oo Illaa hadda la isweydiinayo sababta ay DFS uga hadli la’dahay weerarkii ay ciidamada Itoobiya u adeegsadeen madaafiic lagu burburiyay saanaddii iyo agabkii ciidan ee yaallay xarunta.
Dhanka kale, Maamulka Jubbaland ayaa si adag u eedeeyay Dowladda Federaalka, iyagoo sheegay in DFS weerar kusoo qaaday xarumahooda oo ku yaalla gobolka Gedo.
Dowladda Federaalka ayaa maalmihii la soo dhaafay dhax-maquuraneysay is-diidooyin badan oo la xiriira arrimaha ka jira Gobolka Gedo, si ay xoojiso dhaq dhaqaaqeeda ka dhanka ah Axmed Madoobe, tan iyo wixii ka dambeeyay markii uu fashilmay isku daygeedii Raaskambooni.