War qoraal ah oo ka soo baxay Booliska Soomaaliya ayaa lagu sheegay in ciidanka Booliska Saldhigga degmada Hodan ay gacanta ku soo dhigeen afar dhalinyaro ah oo lagu eedeeyay falal khatar gelinaya amniga waddooyinka iyo badqabka bulshada.
Eedeysanayaasha ayaa lagu kala magacaabay:
1. C/Risaaq Maxamed Faarax
2. Najiib C/llaahi Mire
3. Feysal Cismaan Maxamed
4. C/maalik Maxamuud Daahir
Booliska ayaa sheegay in dhalinyaradan ay muuqaallo khatar ku ah naftooda iyo tan bulshada ku faafiyeen barta TikTok, iyagoo isku dhigayay gaadiidka waddooyinka maraya, taas oo sababi karta shilal iyo khasaare naf iyo maalba leh.
“Eedeysanayaashu waxay ku jiraan gacanta Booliska, waxaana si waafaqsan sharciga loogu gudbin doonaa maxkamadda awoodda u leh,” ayaa lagu yiri warka ka soo baxay Booliska.
Sidoo kale, Booliska ayaa digniin adag u diray cid kasta oo ku kacda falal khatar gelinaya amniga iyo badqabka bulshada, iyagoo sheegay in tallaabo adag laga qaadi doono, si waafaqsan sharciga dalka.
Warkan ayaa ku soo aadaya xilli xalay ciidamada Booliska ay sidoo kale soo xireen dhalinyaro Tiktokers ah oo lagu eedeeyay aflagaado ay u geysteen Madaxweynaha Jamhuuriyadda Soomaaliya, Mudane Xasan Sheekh Maxamuud.