Booliiska Dowlad-Goboleedka Jubbaland ayaa sheegay in uu gacanta ku dhigay Shabakad ka shaqaysa Tahriibinta Dadka gaar ahaan Dhallinyarada waxbarata kaddib dabagal muddo dheer ay ku hayeen oo ugu dambayn gacanta kusoo dhigeen.
Saraakiisha Booliiska Dowlad-Goboleedka Jubbaland ayaa Warbaahinta u sheegay in ciidamada ammaanka ay sameeyeen howlgal qaatay in ka badan 48 saac oo ugu dambayn ay kusoo xireen Dad isugu jira Rag iyo Dumar oo Tahriibka ka shaqaynayay.
Dad u badan Dhallinyaro Arday ah ayay Dadkaas ka shaqaynayeen in ay tahriibiyaan iyaga oo ka qaatay lacago badan oo aanay la shaacin inta ay gaarsiisan tahay taasi waxa ay keentay in Dadka qaar ay ku dhiirradaan Tahriibka.
Kooxaha Tahriibayaasha qafaasha ee lacagaha ka qaata ayaa la sheegay in ay la shaqeeyaan Dad qaarkood ku sugan gudaha Dalka oo dabagal xooggan ay ku hayaan ciidamada ammaanka Dowladda Federaalka Soomaaliya & kuwa Dowlad-Goboleedyada.
Booliiska Dowlad-Goboleedka Jubbaland ayaa waalidiinta dhallinyarada tahriibka loo dirayo kula dardaarmay in ay la socdaan dhaqdhaqaaqooda si looga hortago halista ku horgudban safarkooda lacagaha badan uga baxaya.