Ciyaartoyda kooxda kubadda cagta Manchester United ayaa rumaysan in saxeexii Mason Mount ee kooxdoodu aanu ahayn mid la xidhiidha inuu laacibka reer England u dheelo naadiga, laakiin ay ka lahayd ujeeddooyin kale oo aanay iyagu garanayn
Mason Mount ayay Manchester United kala soo wareegtay Chelsea xagaagii tegay iyaga oo kasoo bixiyey £60 milyan oo Gini, hase yeeshee waxa uu waqtigiisa Old Trafford ku qaatay dhaawac uu illaa hadda ku maqan yahay.
25 jirkan ayaa 12 ciyaarood oo kaliya oo dhamaan tartamada ah u saftay kooxdiisa Manchester United, illaa haddana wax gool ah uma aanu dhalinin Red Devils.
Sida uu qoray wargeyska Manchester Evening News, ciyaartoyda Manchester United ayaa kasoo horjeeday in kooxdoodu ay la saxeexato Mason Mount, markii ayRed Devils go’aanka iibkiisa qaadatayna waxay u arkayeen in aanu ahayn go’aan la xidhiidha kubadda cagta laakiin ay jiraan waxyaabo kale oo ay salka ku haysay arrintani.
Si kastaba ha ahaatee, Mason Mount ayaa lagu arkay garoonka tababarka kooxdiisa maalintii Axaddii, waxaana ay jamaahiirta kooxdaasi rajaynayaan inuu qayb ka noqon doono safka kooxdooda ee ciyaarta Liverpool ee tartanka FA Cup ee Axadda, balse waxa ay u badan tahay in ciyaartani ay waqti hore ku noqon doonto.