Waxaa la xaqiijiyay in uu ku geeriyooday deegaanka Cadow-dibiley ee gobolka Shabeellaha Hoose Taliyihii Guutada 14-ka October ee Ciidanka Xoogga Dalka Soomaaliyeed, Marxuum Nuur Maxamed Gabow (Nuur Farey), ka dib markii lagu weeraray halkaas.
Wararka la helayo ayaa sheegaya in taliyaha lagu dilay rasaas uu furay qof ku labisnaa dareeska ciidanka dowladda, xilli uu kasoo baxayey goob uu ka daganaa deegaankaas. Cadow-dibiley ayaa ku yaalla inta u dhaxeysa degmada Afgooye iyo deegaanka Laanta Buuro.
Marxuum Nuur Farey ayaa hoggaaminayay howl-gallo ka dhan ah Al-Shabaab oo mudooyinkii u dambeeyay ka socday gobolka Shabeellaha Hoose. Mas’uuliyiinta ammaanka ayaa sheegay in wali aysan caddeyn cidda dhab ahaantii ka dambeysay falka dilka ah, inkastoo baaritaanno socdaan.