Ra’iisul Wasaarihii hore ee Soomaaliya Cumar Cabdirashiid Cali Sharmaake oo maanta Muqdisho kula kulmay safiirka Turkiga ee Soomaaliya Alper Aktas ayaa kala hadlay Markabka MV Sea World oo siday qalab ciidan, kaas oo dhawaan ay gacanta ku dhigeen ciidamada Puntland.
Qoraal kooban uu soo dhigay bartiisa Twitterka ee hadda loo yaqan X ayaa Sharmaake ku yiri, “Kulan aan la yeeshay safiirka Turkiga, wuxuu ii sheegay in markabka MV Sea World uu siday qalab ciidan oo loogu talagalay TURKISOM. Safiirku wuxuu sidoo kale sheegay inuu la xiriiray Puntland balse uusan wax jawaab ah ka helin.”
Ra’iisul Wasaarihii hore ee Soomaaliya Cumar Cabdirashiid, oo maamulka Puntland ugu baaqay in ay si degdeg ah ku sii dayso Markabkaan ayaa yiri, “Marka la eego arrintan, Puntland waxaa qabanaya waajibaad sharci ah oo ku qasbaya inay si degdeg ah u sii deyso markabka.”
July 18, 2025 ciidamo ka tirsan maamulka Puntland ayaa ka afduubtay Markab siday saanad ciidan oo laga lahaa Saldhigga Turkiga ee Muqdisho, kaas oo ku soo wajahnaa caasimadda, lana qorsheenayay in uu soo gaaro 21 bishaan.
Dowladda Soomaaliya oo ka hadashay dhacdadaan ayaa ku tilmaamtay burcad badeednimo, balse eedaas waxaa iska fogeeyay maamulka Puntland oo sheegay in Markabkaan ay qabteen Xeebaha Bareedo.