Hoggaanka Macawiisleyda Deegaanka Ceel Cali Axmed Gobolka Shabeelaha Dhexe Dowlad-Goboleedka Hir-Shabeelle ayaa faah-faahin ka bixiyay dagaal socday 24 saac oo ay la galeen dagaalamayaal katirsan ‘AS’ oo deegaankaas ku duullay.
Cabdi Maxamuud Suubiye oo ku magac dheer Cabdi Hubiye oo la hadlay Warbaahinta ayaa sheegay in dagaalka xooggiisa uu ka dhacay Masaajid ku yaalla Deegaanka oo labo kamid ah Gawaarida walxaha qarxa lagu soo raray lagu beegsaday.
Wadartooda ayuu ku sheegay in ay ahayd 25 qof, 5 kamid ah ayuu tilmaamay in ay dagaalka ku dhinteen halka ay dhaawacmeen 10 ruux halka 10 kale ee kasoo hartay ay dagaalameen saacado badan ilaa markii dambe gurmad soo
Suubiye ayaa sheegay in 20 xubnood oo katirsan ‘AS’ in ay ku dileen dagaalka isla markaana maydkooda uu yaallo deegaanka, hub ay wateen ayuu shaaciyay in ay ka furmeen halka dadkii dhaawaca soo gaaray ay u qaadeen goobo caafimaad.
Gaadiidka Dowladda ee gurmadka ahaa ayuu sheegay in ay ‘AS’ jidka u galeen balse aqoonta ay u leeyihiin deegaankooda ay u suuragalisay in ay maraan waddo fudud oo ugu dambeyn dhaawacyada ka gudbiyeen kana soo gudbiyeen ciidamada Federaalka.
Saraakiil katirsan Ciidanka Xoogga Dalka oo deegaanka gaaray ayaa sheegay in ciidamu saldhig ka dhigteen deegaankaan, ‘AS’ oo dagaal safmar ah ku qaadday deegaanno katirsan Gobolka Shabeelaha Dhexe waxaa ka dhashay khasaara isugu jira dhimasho iyo dhaawac.
Diyaarado dagaal ayaa lagu warramayaa in ay fuliyeen duqeyn xooggan oo ka dhan ah ‘AS’ waxaana suuragashay in deegaannada qaar ay dib u qabsadeen Ciidamada Dowladda Federaalka oo garab ka helaya Macawiisleyda.