Afhayeenka Ciidamada Booliiska Soomaaliya Qaasim Axmed Rooble oo Warbaahinta la hadlay ayaa faah-faahin ka bixiyay khasaaraha ka dhashay dagaalkii tooska ahaa iyo qaraxyada isla socday ee ‘AS’ ay ku qaadday Hotel SYL ee Magaalada Muqdisho.
Qaasim ayaa sheegay in la toogtay 5 dagaalame oo katirsan ‘AS’ halka Ciidamada Ammaanka ee howlgalkaas ku jiray ee dagaalka la galay ay ka dhinteen 3 askari waxaana uu dhaawaca ku sheegay 27 ruux oo 18 kamid ah ay yihiin rayid halka 9kale ay yihiin ciidamo.
Waxa uu intaas ku daray in lasoo badbaadiyay mas’uuliyiin ka kala tirsan Hay’adaha Xeer Dejinta waa Baarlamaanka iyo Fulinta Golaha Wasiirrada halka ay dhaawacyo fudud ay soo gaareen 3 Xildhibaan iyo mas’uuliyiin kale.
Afhayeenka Booliiska oo ay Suxufiyiinta waydiiyeen sababta weerarkaas uu uga dhacay mid kamid ah goobaha amnigooda sida aadka ah loo adkeeyo waxa uu ku warceliyay in baaritaanno ay wadaan wixii natiijo ahna dib lasoo gudbin doonno.
Weerarka saacadaha badan socday ayaa dhaliyay dhimashada Dad isugu jiray Rayid, Kooxihii weerarka fuliyay iyo ciidamada ammaanka halka dadka dhaawacmay qaarkood lagu dawaynayo goobaha caafimaadka ee Magaalada Muqdisho.