Guddoomiyaha Golaha Shacabka ee BJFS Sheekh Aadan Madoobe ayaa shir-guddoomiyay kulanka banbaxa guddiga ah ee Golaha Shacabka oo maanta lagu soo gaba-gabeeyay magaaladda Kismaayo ee caasimadda KMG ah dowlad-goboleedka Jubbaland.
Kulanka oo maalmihii lasoo dhaafay ka socday magaaladda Kismaayo ayaa xubnaha Guddiga Joogtada waxa ay uga hadlayeen ajendayaasha kal-fadhiga shanaad ee golaha shacabka.
Inta kulanka uu socdaa ayaa waxaa lagu ansixiyay laba qeybood oo kala ah ajendayaasha guud ee kal-fadhiga shanaad iyo qeybta labaad oo ah in hoos loo daadago, islamarkaana loo wajaho sida ay ajendayaasha horutabinta u kala leeyihiin.
Sidoo kale xubnaha Guddiga Joogtada ah ayaa ka hadlay in kal-fadhiga shanaad lagu sii amba-qaado islamarkaana lagu dhameystiro inta ka hartay ajendayaashii kal-fadhigii afaraad ay xukuumadda soo gudbisay iyo kuwo cusub oo ay kal-fadhiga shanaad soo gudbisay kuwaas oo hada Golaha horyaala.
Shirka Guddiga Joogtada oo maanta si rasmi ah loo soo gaba-gabeeyay ayaa xubnaha Guddiga Joogtada waxa ay isku raaceen in kal-fadhiga shanaad xoogaa lagu saaro ajendayaasha muhiimka u ah dowladnimada Soomaaliya.
Sheekh Aadan Madoobe ayaa ugu dambeyntiina xubnaha Guddiga Joogtada ah uga mahad-celiyay maalmihii shirka uu socday dadaalkii Iyo howlkarnimadii ay muujiyeen, waxaa uuna dhanka kale u mahad-celiyay madaxda Iyo shacabka dowlad-goboleedka Jubbaland soo dhoweyntii ay u sameeyeen isaga iyo wafdigiisa.
Kulanka maanta ayaa sidoo kale waxaa ka qeyb-gashay Guddoomiye Ku-xigeenka Koowaad ee Golaha Shacabka Sacdiya Yaasiin Xaaji Samatar.
Furitaanka kal-fadhiga shanaad ee baarlamaanka ayaa waxa uu qorshuhu yahay inuu meel-mariyo sharciyo dhor ah oo kamid yahay kan doorashooyinka, guddiga doorashooyinka iyo xeerka lagu dhisayo iyo weliba sharciga axsaabta, sida ay ogaatay Caasimada Online.
Madaxtooyadda oo gacan ka helaysa guddoonka baarlamaanka ayaa qorsheynaysa in sharciyadan ay marsato baarlamaanka marka la furo kal-fadhiga shanaad, xilli ay Xildhibaannada qaar muujinayaan saluug iyo balamihii hore loo fulin.
Villa Somalia ayaa horey u marsatay baarlamaanka afartii cutub ee dastuurka ee mucaaradka ka qeyliyay iyo heshiiskii Turkiga ee illaa hadda baarlamaanka aqoonin wax ku qoran, kuwaasi oo dhamaantood ku gacan isiyay guddoonka baarlamaanka Soomaaliya. Waxaana hadda isha lagu hayaa sida ay wax noqon doonaan.