Maalmo kahor diyaarad nuuca Helicopterka ah oo ay laheyd Qaramada Midoobay ayaa ku degtay deegaan ay maamulaan kooxda Al Shabaab, kaddib markii diyaaradaasi ay lasoo daristay cillad farsamo.
Diyaarada ayaa la sheegay in ay saarnaayeen shaqaale isugu jiray Soomaali iyo ajaaniib , waxaana la sheegay in kooxda Al Shabaab ay dileen qaar kamid ah dadkii diyaarada la socday ,halka kuwa kalana ay nolol ku wateen kooxdaasi.
Afar muwaadin oo u dhashay dalka Ukraine ayaa la sheegay in ay kamid ahaayeen shaqaalihii saarnaa diyaarada gacanta u gashay kooxda Al Shabaab sida ay sheegtay wasaaradda arimaha dibadda ee Ukraine.
“Muwaadiniinteenu waxay kamid ahaayeen shaqaalaha diyaarad u hawlgalaysay xafiiska Qaramada Midoobay ee Soomaaliya…Jinsiyadu waa la xaqiijiyay,” ayuu yiri afhayeen u hadlay dowladda Ukraine
Diyaaradan ku degtay deegaanka Al Shabaab maamulaan ayaa ka kacday magaalada Baladweyne waxa ayna kusii jeeday degmada Wisil, diyaarada ayaana la sheegay in ay waday qalab caafimaad , sidoo kale soo qaadeysay dad dhaawacyo qabay.