Kulan ay yeesheen Xildhibaannada labada Aqal ee Baarlamaanka Soomaaliya ayaa lagu meel mariyey miisaaniyadda dowladda Soomaaliya ee sanadka 2025-ka, taas oo gaareysa $1,342,476,311, iyada oo hal ku dhig loogu dhigay KU TIIRSANAANTA AWOODDEENA DAKHLI.
Meelmarinta miisaaniyadda oo dood iyo falan qeyn ay ka yeesheen Xildhibaannada labada Aqal ee Baarlamaanka Jamhuuriyadda Federaalka Soomaaliya ayaa la soo jeediyey in ay mushaar kordhin loo sameeyo ciidanka dowladda, balse soo jeedinta qaar ka mid ah Xildhibaannada waxaa qaadacay Wasaaradda Maaliyadda Soomaaliya.
Dooda Xildhibaannada ayaa salka ku haysay kor u qaadista mushaarka ciidanka dowladda, taas badalkeed Wasaaradda Maaliyadda ayaa sheegtay in ciidanka qaar loo waayey mushaar, balse Wasaaradda waxa ay kor dhisay miisaaniyadda ku bixi jirtay ciidama Booliska iyo NISA, halka miisaaniyadda ciidanka Xoogga hoos ugu dhacday 7 Milyan, waxaana iyada wax iska badalin miisaaniyadda ciidanka Asluubta oo 2025 aan wax loo kordhin.
Marka la eego qoondada Hay’adaha ee Miisaaniyadda sanadka 2025-ka, 35% ayaa loo qoondeeyey in ay ku baxda Caafimaadka, Waxbarashada, Amniga iyo Difaaca, kuwaas oo dhammaantood la wada kordhiyey, marka laga reebo Difaaca oo hoos loo dhigay.
Kutalagalka Miisaaniyadda Difaaca ee sanadka 2024 ayaa gaareysa $178,142,410, halka sanadka 2025-ka laga dhigay $171,002,350, taas oo la micnaha in uu jiro faraq dhan $7,140,060.
Qarashaadka loo qoondeeyey Difaaca ayaa ku kala baxaya; Wasaaradda Gaashaandhiga oo loo qoondeeyey $3,732,795, qoondadooda Taliska Ciidanka Xooga Dalka ay gaareysa $163,436,555, Maxkamadda Ciidamadda ayaa loo qoondeeyey 3,740,000, Hay’adda Naafada iyo Agoonta C. Qalabka Sida oo loo qoondeeyey $93,000.
Miisaaniyadda loo qoondeeyey Amniga gudaha ayaa korortay, qoondada 2024 ayaa gaareysa $77,483,925, halka qoondada miisaaniyadda 2025-ka laga dhigay $84,329,615, taas oo ka dhigan in Wasaaradda Amniga loo qoondeeyey $1,581,269, Taliska Ciidanka Booliska ayaa miisaaniyaddooda laga dhigay 49,333,986, si la mid ah ciidanka NISA ayaa la kordhiyay waxa ayna gaareysaa $27,998,720, iyo Hay’adda Socdaalka iyo Jinsiyadaha oo laga dhigay $5,415,640.
Caafimaadka iyo Waxbarashada ayaa ka mid ah Hay’adaha ugu badan ee ay ku baxdo Miisaaniyadda dowladda. Qoondada loo qorsheeyey Caafimaadka ayaa dhan $91,614,620, halka Miisaaniyadda loo qoondeeyey Waxbarashada iyo Tacliinta Sare ay gaareysa $110,417,499.