3 qof oo ku dhimatay halka ay ku dhawaacmeen 2 kale ka dib Qarax ka dhacay Maqaayad ku taal Muqdisho

Dhimasho iyo dhaawac ayaa ka dhashay qarax maanta ka dhacay magaalada Muqdisho, gaar ahaan degmada Xamar weyne, iyada oo inta badan jugta qaraxa laga maqlay degmooyinka gobolka Banaadir.

Taliska Booliska oo soo saaray warsaxaafadeed ayaa ku sheegay in qof walxa qarxa isku soo xiray uu isku qarxiyey makhaayqadda Alhindi oo ku taal degmada Xamar Weyne ee gobolka Banaadir, iyada oo qasaaraha ka dhashay qaraxa uu Boolisku ku sheegay 3 qof oo dhimasho ah iyo laba qaf oo dhaawac.

Warka ka soo baxay Booliska ayaa lagu yiri, “Degmada Xamar weyne, Maanta 16 Jan 2024, abaaro 11:40Am, yaa qof naftii haligaa isku qarxiyay banaanka hore ee  makhaayada Alhindi. Qasaaraha ka dhashay, ayaa ah Dhimasho 3 iyo Dhaawaca 2 qofood oo goobta ka dhawaa.”

Sidoo kale warka ka soo baxay Booliska ayaa lagu sheegay in ciidanka ay bursanayeen Hafti-haligaha, “Ciidanka Boliiska oo goobta ka dhawaa ayaa eryanayay Hafti-haliga, wuxuuna qarxay isaga oo ciidanka ka cararaya.”

Ugu dambeyn laamaha ammaanka ayaa sheegay in “Ciidamada amaanka ayaa goobta ku sugan waxaan socota baarista, si aan wax faahfaahsan dadka ula wadaagno,” sida lagu soo gabagabeeyey warka ka soo baxay Booliska.

Amniga Muqdisho ayaa muddooyinkii ugu dambeeyey soo hagaagayey ka dib markii ciidanka Hay’adda Nabad Sugidda iyo Sirdoonka Qaranka ay baaritaanno joogto ah ku bilaabeen nuucyada kala duwan gawaarida iyo Mooto Bajaajta.