Turkey oo cabsi ka qabo Isreal kuna dhawaaqay talaabooyin deg deg ah.
Madaxweyne Recep Tayyip Erdogan maanta ku dhawaaqay in warshadaha gaashaandhigga dalkiisa ay noqon doonaan kuwo si buuxda iskood u madax-bannaan, isagoo xusay in Turkigu uu isagu soo saari doono diyaaradaha dagaalka, taangiyada, diyaaradaha aan duuliyaha lahayn (drones), iyo markabyo dagaal (frigates), xilli ay Israel iyo Iran isdhaafsanayeen weerarro maalintii lixaad ah.
“Waxaan sare u qaadnay heerka wax-soo-saarka gudaha iyo kan qaran ee difaaca oo markii hore ahaa 20%, iminkana gaarsiinnay 80%,” ayuu yiri Erdogan isaga oo khudbad ka jeedinayey kulanka kooxda xisbiga AKP ee baarlamaanka.
“Waxaan ku socon doonnaa samir, go’aan adag, dulqaad iyo tallaabooyin miro-dhal ah illaa aan ka gaarno yoolkeenna ah madax-bannaani buuxda oo ku saabsan warshadaha difaaca,” ayuu intaas ku daray.
Isagoo ka hadlayay weerarada Israel ee ka dhanka ah Iran iyo xiisadda sii kordhaysa ee gobolka, Erdogan wuxuu sheegay in saraakiisha Turkiga ay si buuxda ugu jiraan feejignaan, islamarkaana diyaarinayaan qorshayaal deg-deg ah oo looga hortago halis kasta oo dhici karta.
“Waxaan kor u qaadi doonnaa awooddeenna difaac si heerka cabsi-gelinteenna loo gaarsiiyo heer aan cidi na weerari karin — xitaa aysan u fikirin,” ayuu yiri Erdogan. Wuxuu intaas ku daray in Turkigu dhawaan dhameystiray mashruucyo dhowr ah oo qaran ah oo la xiriira difaaca, sida nidaamyada difaaca cirka, maraakiib dagaal, gantaallo cruise ah, diyaarado aan duuliye lahayn, iyo helikobterro dagaal.
Erdogan wuxuu weerarka Israel ku qaaday Iran ku tilmaamay “argagixiso dowladeed”, isagoo ku eedeeyay dowladda Ra’iisul Wasaare Netanyahu in ay iska indhatireyso xeerarka iyo shuruucda caalamiga ah.
“Waa arrin dabiici ah, sharci ah, isla markaana xaq u ah in Iran ay isdifaacdo marka ay la kulanto falalka burcadnimo ee Israel,” ayuu yiri. Wuxuu intaa ku daray in weerarrada lagu qaaday Iran ay dhaceen iyadoo ay socdaan wadahadalladii ku saabsanaa barnaamijka nukliyeerka ee dalkaasi.
Kadib kulankii Golaha Wasiirrada ee Isniintii, Erdogan wuxuu sidoo kale shaaciyay in Ankara ay dedejinayso qorshayaasha wax-soo-saarka si loo gaaro heer wax-ku-ool ah oo ah kaydka gantaallada dhexe iyo kuwa fog.
Saaxiibada ku dhow Erdogan, ayaa Talaadadii ka digay qorshayaal Israel leedahay oo ku wajahan gobolka. Wuxuu sheegay in ujeeddada siyaasadeed iyo istaraatijiyadeed ee Israel ay tahay in la hareereeyo Turkiga.
Dadka baraha bulshada waxa ku qora ee Israel ayaa bilaabay fariimo Internetka ah oo ku wajahan Turkey gaar ahaan in ay sheegayaan in Iran ka dib Isreal ku wajahantahay Turkey. Sidoo kale warbaahinta Isreal ayaa bilaawday Kanaalo ku hadla afka Turkey si loo abuuro dacaayado ka dhan ah Erdogan.