Madaxweyne, Xasan Sheekh Maxamuud, ayaa si cad u muujiyay aragti dhiirrigelin u eg oo ku aaddan musuqmaasuqa, kadib hadal uu si toos ah ku difaacayay Wasiirka Awqaafta iyo Arrimaha Diinta, Mukhtaar Roobow Cali, oo lagu eedeeyay musuq hanti dadweyne.
Madaxweyne Xasan Sheekh ayaa maanta yiri: “Wasiir Mukhtaar Roobow lacag ayuu dhacay, hebel iyo hebel ayuu u dhiibtay. Wasaaradda qeylo badan ayaa isoo gaartay, waxaan dhahay Wasaaradda sow isaga masuul kama ahan.” Hadalkan wuxuu tilmaamayaa in Madaxweynaha uu si bareer ah u qiray eedeymaha musuqmaasuqa, balse uusan qaadin wax tallaabo ah oo sharci ah.
Sida uu dhigayo dastuurka dalka iyo hab-maamulka dowlad wanaagga, Madaxweynaha waa masuulka ugu sareeya ee ilaalinaya anshaxa iyo daahfurnaanta maamulka. Waa masuuliyaddiisa in uu xil ka qaado ama baaritaan ku amro wasiir kasta oo lagu eedeeyo xatooyo hanti dadweyne.
Tani ma aha kaliya arrin ku eg Mukhtaar Roobow, balse waa calaamad kale oo muujinaysa sida ay u liidato isla xisaabtanka iyo hufnaanta maamulka ee dowladda Xasan Sheekh.