Magacaabista Ra’iisulwasaare Cusub- Awood Siyaasadeed oo ka Dhalata Marxaladda Kala-guurka
Taariikhda siyaasadda Soomaaliya waxay marar badan muujisay in Ra’iisulwasaare kasta oo la soo magacaabo xilliyada kala-guurka uu si toos ah u noqdo xuddunta awoodda siyaasadeed. Tani ma aha arrin ku dhisan shakhsiyaad, balse waa xaqiiqo siyaasadeed oo ku saleysan duruufaha waqtiga iyo isbeddellada awoodda.
1. Xilliga kala-guurka iyo hoos u dhaca saameynta Madaxweynaha
Marka la gaaro marxalad kala-guur ah, isla markaana waqtiga Madaxweynaha uu gabaabsi noqdo, beesha caalamka, safiirrada, iyo hay’adaha shisheeye waxa ay si toos ah ula macaamilaan Ra’iisulwasaaraha cusub, maadaama loo arko wajiga cusub ee hoggaanka siyaasadeed.
2. Doorka Ra’iisulwasaaraha ee saamileyda siyaasadda gudaha
Saamileyda siyaasadda, hoggaamiyeyaasha maamul-goboleedyada, iyo awoodaha siyaasadeed ee dalka gudahiisa waxa ay xiriirkooda si toos ah ula yeeshaan Ra’iisulwasaaraha cusub.
Xaalado badan oo la soo arkay, Madaxweynaha waqtigiisu gabaabsi yahay waa laga shoowraa , waxaana go’aamada waaweyn lagu saleeyaa aragtida iyo jihada Ra’iisulwasaaraha cusub.
3. Xaaladda Xasan Sheekh Maxamuud iyo Xamse Barre
Dhab ahaantii, Madaxweyne Xasan Sheekh Maxamuud ma heli doono Ra’iisulwasaare la mid noqon kara Xamse Barre marka la eego dhega nuglaanshaha
4. Hay’adaha Dowladda iyo u janjeeridda awoodda cusub
Hay’adaha dowladda, xataa marka Madaxweynaha aanu si buuxda u saameyn ku lahayn go’aannada, badanaa waxa ay noqdaan kuwo u nugul jihada Ra’iisulwasaaraha cusub, iyagoo ka akhriya awoodda dhabta ah ee ka jirta masraxa siyaasadda.
Gunaanad – Magacaabista Ra’iisulwasaare cusub xilli kala-guur ah ma aha oo kaliya isbeddel shaqsi, balse waa isbeddel awood siyaasadeed. Waa marxalad uu Ra’iisulwasaaruhu si dabiici ah u noqdo xarunta go’aan-qaadashada, halka Madaxweynaha waqtigiisu gabaabsi yahay uu si tartiib ah uga sii baxayo saameynta siyaasadeed ee dhabta ah.
Yoolbaar Media