Xiisadda u dhexeysa Pakistan iyo Afgaanistaan ayaa si lama filaan ah u sii xoogeysatay.Ciidamada cirka ee Pakistan ayaa fuliyay duqeymo xooggan oo ay ku beegsadeen gobollada Nangarhar, Paktika iyo Khost ee bariga Afgaanistaan. Wararka ayaa sheegaya in ilaa toddobo xero la burburiyay intii ay socdeen hawlgalladaas.
Pakistan waxay sheegtay in duqeymahaasi ay ahaayeen jawaab ka dhalatay weerarro argagixiso oo kusoo kordhay gudaha dhulkeeda, kuwaas oo lagu dilay tobaneeyo askari oo ka tirsanaa ciidamadeeda.
Dhanka kale, iyagoo ka jawaabaya duqeymaha cirka, ciidamada Afgaanistaan ayaa la sheegay inay bilaabeen weerar dhulka ah oo ay ku qaadeen saldhigyo Pakistan ku leeyihiin xadka. Afgaanistaan, waxay sheegteen inay qabsadeen laba xero oo Pakistan leedahay, isla markaana ay dileen tiro askar ah.Si kastaba ha ahaatee, Pakistan ayaa beenisay sheegashadaas, iyadoo ku adkeysatay in aysan jirin saldhigyo laga qabsaday.
Ilaa hadda, ciidamada cirka ee Pakistan ayaa la sheegay inay sii wadaan hawlgalladooda duqeynta ah.