Walax dhawaan laga helay samada sare ayaa maanta oo Arbaco ah aad ugu soo dhawaanaya dhulka.
Cirbixiyeennada ayaa sheegaya in safarka walaxdaas uu dhulka u soo galay 50,000 oo sanadood.
Sawirro ay soo qaadeen cirbixiyeenno ayaa muujinaya walax ku dadan midab cagaar ah.
Hasayeeshee waxaa niyadjabi doona dadka filaya in cirka ay ku arki doonaan wax dhalaalaya, maadaama iftiinka walaxdaas aanan lagu arki karin isha bini’aadamka oo mutuxan.
Waxaa suuragal ah inaad aragteen warbixinno sheegaya in iftiinka ka soo baxaya walaxdaas cagaarka ah uu ifin doono samada,” ayuu yiri Dr Robert Massey, agaasime ku xigeenka ururka ay ku midaysan yihiin cirbixiyeennada ee Royal Astronomical Society.
“Nasiibdarro, wax noocaas oo kale ma dhici doonaan.”
Si kastaba xaalku ha ahaadee, markii laga soo tago habaaska iftiinka walaxdaas iyo samada madow ee ka hoosaysa, waxaa suuragal ah inaad cirka ku aragtid calaamad – waa haddii aad og tahay waxa aad raadinaysid.
Dadka dayaxa raacraaca ayaa ugu dhaw fursadda lagu arki karo walaxdaas weliba marka ay isticmaalaan qalabka wax lagu wayneeyo, markaas oo ay walaxdu ugu muuqan doonto sida walax caddaan ah oo uu humaag ku jiro oo aanan si fiican loo arkayn.
“Xitaa ookiyaalaha wax lagu arko waad ku arki kartaa walaxdaas,” ayuu yiri Massey.
Walaxdan loo yaqaan Comet, ayaa waxa ay ka samaysan tahay baraf iyo boor. Markii walaxdaas ay aaddo dhanka qorraxda, ayuu barafku bilaabaa inuu milmo halka habaaskuna uu soo daato, kuwaas oo sameeya xariiq dheer.
“Haddii aad nasiib badan tahay, waxaad arki doontaa xariiqaasi halkaas ka soo baxaya, taasna waxa ay u egtay qeyb sare oo ka mid ah walaxdaas comet-ka ah,” ayuu yiri Massey.
Cirbixiyeennada ayaa bishii Maarso ee tagtay waxa ay hawada gobolka California ku arkeen walaxdan lagu magacaabo comet ee ay ku asteeyeen C/2022 E3 (ZTF).
Waxa ay heerkii ugu dhawaa Arbacada usoo gaaraysaa dhulka oo ah qiyaastii 41 milyan oo km.
In walaxdaas la helay, waxa ay tilmaamaysaa buu yiri Massey, baadigoobkii ugu horreeyay ee xiddigga iftiinka badan ee loo yaqaan Pole, taas oo badanaa lagu arko isla bartaas cirka ah.
Waxaad xiddiggan Pole ku arki kartaa inaad si toos ah u eegtid waqooyiga sidaas oo aad ku arki kartid xiddigga halkaas lulanaya.
Waqtiga ugu wanaagsan ee la eegi karo waa saacadaha hore ee subaxa Khamiista marka dayaxa uu sii xaroonayo.
Waqtigaas ayuu Comet ka soo muuqanayaa dhanka midig ee xiddigga Pole.