Sida ay u xaqiijiyeen ilo lagu kalsoon yahay radiohalgan.com Madaxweynaha Dawladda Federaalka Soomaaliya Xassan Sheekh Maxamuud ayaa amar ku bixiyay in lasoo raro Ciidanka Xoogga dalka ee ku sugan gobalka Gedo.
Ciidamada oo katirsan Guutada Gorgor ayaa la qorsheeyay in todobaadkan laga soo daabulo deegaannada ay kaga sugan yihiin gobalka Gedo.
Xassan Sheekh ayaa soo qaadista ciidamada iyo dajintooda u xil saaray Agaasimaha Hay’adda Sirdoonka iyo Nabad-sugida DFS Mahad Salaad. Xogaha ayaa intaa ku daraya in ciidamada la geyn doono deegaanka Galcad oo ay dhawaan la wareegeen ciidamada dawladda Faderaalka Soomaaliya.
radiohalgan.com ayaa heshay xog dheeraad ah oo sheegaysa in soo saarida ciidamada oo si gaar ah u jooga deegaanada xaduudaha xiga si ay amniga u sugaan, laga leeyahay dano siyaasadeed oo la xariira maamulka gobalkaas.
“Degmada Baladxaawo AMISOM ma joogto, waxaa amaankeeda masuul ka’ah Ururka Gorgor, hadii laga soo qaadana waxay keeni kartaa khataro culus” ayuu yiri sarkaal sare oo katirsan laamaha Amniga ee gobalka Gedo.
Deegaankan, ayaa ah mid ay ku kulmaan 3 xaduud oo kala ah Itoobiya, Kenya iyo Soomaaliya, waxaana dhammaan goobahan jooga ciidanka xoogga dalka.