Xil. Qaali Cali Shire ”Fahad hadalkiisa waa qaniinyo qaniinyaa kaa fujiso

119

Xildhibaan Qaali Cali Shire oo ka mid ah Mudanayaasha Baarlamaanka 11aad ee Federaalka Soomaaliya oo ka hadashay eedeynta Agaasimihii hore ee NISA Fahad Yaasiin Xaaji Daahir u jeediyay Agaasimaha NISA Mahad Salaad ayaa ku sheegtay in ay tahay qaniinyo qaniinyaa kaa fujiso.

Qaali Shire oo Warbaahinta kula hadashay xarunta Golaha Shacabka BFS ayaa tiri “Raggii isaga shalay ku soo eedeeyay dambi waliba isaga oo Hay’adda Nabad sugidda gacanta ku haya awoodna u leh, waan ku garab istaagi laheen ragga uu maanta ku eedeeyay, maalintii shalay haddii uu dhihi lahaa raggaan ayaa qaladka iska leh” sida ay tiri Xildhibaan Qaali.

Xildhibaan Qaali Shire oo hadalka sii wadata ayaa tiri “Hadalkaas maalin buu lahaa, maalin buu quruxbadnaa, maalin buu wax ka qabad lahaa, waxa aan leenahay weli fursad ayaa heysataa waxa aad heyso soo bandhig” sida ay tiri Qaali Shire oo ka mid ah Mudanayaasha BFS.

Dhanka kale Xildhaan Qaali iyada oo ka hadleyso eeda Fahad Yaasiin Agaasimihii hore ee NISA ayaa tiri “Fasiraad kaliya ee aan u hayo waa qaniinyo qaniinyaa kaa fujiso, ragga shalay eedeeyay ee dhahay isagaa ka dambeeyay in uu maanta dhaho iyaga ka dambeeyay”

“Dib haddii kiiska loo furayo Fahad ha yimaado, dalka ha soo galo, caddeyn ha keeno, shalay sida ay isaga u daba galeen, maanta isaga ha u dabo galo Maxkamad ha soo saaro”  ayee ku soo gabo gabeesay hadalkeeda Xildhibaan Qaali Shire.

Fahad Yaasiin oo ahaa Agaasimihii hore ee NISA ayaa lagu eedeeyay in uu kaalin kulahaa dilka Ikraan Tahliil oo aheed sarkaald ka tirsan NISA sida ay sheegeen ehelkeeda, balse wareysi uu baxshay ayuu dilka Ikraan ku eedeeyay qaar ka mid ah madaxda dalka.

LEAVE A REPLY

Please enter your comment!
Please enter your name here