Haramcad ayaa u dhacay maxkamad magaalo u dhow caasimadda Hindiya ee New Delhi, waxaana uu dhaawacay ugu yaraan shan qof, sida ay booliisku sheegeen.

Muuqaal laga duubay dhacdadan oo qabsaday baraha bulshada ayaa muujinaya dhowr nin oo ku dhaawacmay weerarka, oo uu ku jiro nin dhaawaciisa liitay oo laga qaaday maxkamadda magaalada Ghaziabad.

Booliis xiran dhanka difaaca jirka ayaa shabaq u dhigay halkaasi si ay u qabtaan Haramcadka galay gudaha maxkamadda, sida uu muujinayo muuqaal ay heshay AFP.

“Haramcadka ayaa ku soo booday dhismaha maxkamadda, waxaana dhaawacmay shan illaa lix qof,” ayuu sarkaal ku sugan saldhigga booliiska deegaankaasi u sheegay AFP, isagoo diiday in uu magaciisa sheego.

Ghaziabad oo ku taal cirifka bari ee magaalada New Delhi ayaa ku dhow dhul kayn ah oo uu Haramcadku ku badan yahay.

Ugu yaraan 12,000 oo Haramcad ayaa ku nool guud ahaan Hindiya.