Magaalada Baqdaad ee caasimadda dalka Ciraaq oo sanado ka hor aan lagu dhiira karin in la tago ayaa martigelinaysa Shir Madaxeedka Jaamacadda Carabta.
Ciraaq oo muddo dheer la daalaa-dhacaysay dagaallo iyo xasilooni darro siyaasadeed, ayaa doonaysa in shirkan uu noqdo fursad ay ku muujineyso soo kabasho iyo kaalinteeda cusub ee Siyaasadda gobolka.
Dowladda Ciraaq ayaa dadaal badan gelisay diyaarinta shirkan, iyadoo la adkeeyay amniga, laguna casuumay dhammaan madaxda Carabta.
Shirka Madaxda Carabta ayaa diirada lagu saari doona xaaladda Falastiin, nabadgelyada gobolka, la-dagaalanka argagixisada, dhaqaalaha, iyo iskaashiga tamarta.
Ciraaq waxay si gaar ah uga codsatay waddamada Carabta in ay mideeyaan mowqifkooda ku aaddan arrinta Falastiin, si wax loogu qabto shacabkaasi.
In kasta oo Ciraaq ay weli wajaheyso caqabado gudaha ah sida musuqmaasuq, kooxo hubeysan, iyo faragelin shisheeye, haddana shirkan waxa uu muujinayaa rabitaankeeda ah in ay mar kale ku laabato miiska go’aanada ku gaaraan Madaxda Carabta.
Waxaa la dareemayaa in Baqdaad ay rabto in ay la tartanto magaalada Riyadh ee Sacuudi Carabiya iyo Qaahirada Masar oo ah magaalooyin si weyn ugu loolama doorka hoggaamineed ee gobolka.
Shirka Madaxeed ee Carabta 2025 ee Baqdaad ka socda waa fursad diblomaasiyadeed oo taariikhi ah oo ay Ciraaq uga faa’iidaysan karto in ay dib isu dhisto, sumcadna yeelato.
Haddaba Soomaaliya ayaa Ciraaq la wadaagta duruufaha dagaalada sokeeye iyo dagaalka Ururada hubeysan, waxaana la tilmaamaya in Dowladda Federaalka cashirro badan ka baran karto tillaabooyinka Xukumadda Baqdaad.