Mudanayaasha Golaha Shacabka Baarlamaanka Federaalka Soomaaliya ayaa maanta yeeshay kalfadhiga labaad kulankiisa 16aad, kaas uu shirguddoomiyey Guddoomiye ku xigeenka labaad ee Golaha Shacabka Cabdullaahi Cumar Abshirow.
Ajandaha kulanka maanta ayaa ahaa meel marinta sharciga Korontada dalka iyo Sharciga Hay’adda Nabad Sugidda iyo Sirdoonak Qaranka NISA, kaas oo ay Xildhibaannada Golaha Shacabka ay ku sameeyeen Akhrin koowaad iyo mid labaad.
Guddoomiye ku xigeenka labaad ee Golaha Shacabka Cabdullaahi Cumar Abshirow oo kulanka shirguddoomiyay ayaa ku dhaawaqay natiijada meelmarinta Sharciga karoontada, isaga oo sheegay in 148 xildhibaan ay Haa ugu codeysay sharcigaan.
Dhanka kale Xildhibaannada Golaha Shacabka BFS ayaa ansixiyay Hindise sharciyeedka Hay’adda Nabad Sugidda iyo Sirdoonka Qaranka NISA, 144 mudane ayaa Haa ugu coddeysay, Saddex Xildhibaan ayaa ka aamustay halka hal xildhibaan uu diiday.
Meel marinta ka dib Bayaan ka soo baxay Hay’adda Nabad Sugidda iyo Sirdoonka Qaranka ayaa lagu sheegay in Agaasimaha Hay’adda uu ugu mahadcelinaya Mudanayaasha Golaha Shacabka Baarlamaanka Federaalka Soomaaliya meel marinta sharciga Hay’adda, isaga oo ka codsaday Golaha Aqalka Sare in ay meel mariyaan xeerkaan.
Hay’adda Nabad Sugidda iyo Sirdoonka Qaranka ayaa markii ugu horreysay yeelenysa sharcigii u horreeyay ee Hey’adda tan iyo dowladdii Kacaanka ee Hey’adda loogu yeeri jiray NSS, Agaasimaha NISA Mahad Salaad ayaa noqday agaasimihii u horreeyay ee Hey’adda soo mara oo sharci u sameeya, isla markaana ay ansixiyaan Golaha Wasiirada iyo Golaha Shacabka ee BFS