Dowladda Federaalka Soomaaliya ayaa sheegtay in Ciidanka Hay’adda Nabad Sugidda iyo Sirdoonka Qaranka NISA iyo Saaxiibada Soomaaliya ay Howgal ka fuliyeen deegaannada Tawakal iyo Garasjeeleed oo 12 KM dhanka Galbeed kaga beegan Degmada Jannaale ee Gobolka Shabeelaha Hoose.
Wasiir ku xigeenka Wasaaradda Warfaafinta Xukuumadda Federaalka Soomaaliya Cabdiraxmaan Yuusuf Al-Cadaalla oo warbaahinta kula hadlay Magaalada Muqdisho ayaa sheegay in Howlgalka ay Ciidanka Dowladda ku dileen 136 ka tirsan Dagaalamayaasha Al-Shabaab kuwaas oo ku sugnaa goobta uu ka dhacay Howgalka.
Sidoo kale Wasiirka ku xigeenka Wasaaradda Warfaafinta Soomaaliya ayaa sheegay in Howlgalka lagu dhaawacay 98 ka tirsan dagaalamayaasha Al-Shabaab, isaga oo wasiirka hadalkiisa sii raacsiiyay in uu dhaawac gaaray qaar ka mid ah horjoogalaay ka tirsan kooxda oo ku sugnaa goobta uu ku dhacay Howlgalka.
Dhanka kale Wasiir ku xigeenka Wasaaradda Warfaafinta Xukuumadda Federaalka Soomaaliya Cabdiraxmaan Yuusuf Al-Cadaalla ayaa sheegay in goobta lagu burburiyay gaadiid ay saanad ahaan u itcimaalayeen iyo gaadiid ay ugu talageen in ay ku filiyaan Qaraxyada, waa sida uu hadalka uu u dhigay.
Qaar ka mid ah Gobollada Dalka ayaa waxaa ka socda dagaal ka dhan ah dagaalamayaasha Al-Shabaab, iyada oo Ciidanka Dowladda iyo kuwa deegaanka ee loo yaqaan macawiisleyda ay la wareegeen deegaanno dhowr ah oo dhacay Dowlad Gobaleedyada Hirshabeelle iyo Galmudug.