Rasaas goos goos ah iyo qaraxyo ayaa laga maqlayaa maalintii 5aad magaalada Laascaanood, halkaas oo maalmihii la soo dhaafay ay si xooggan ugu dagaalamayeen maleeshiyada degaanka ee SSC oo dhinac ah iyo ciidanka Somailland.
Xaalada magaalada ayaa cakiran, labada dhinac ee dagaalamaya ayaa haatan u muuqda iney isku daaleen oo lakala adkaan la yahay, iyadoo maalinba maalinta ka dambeysa khasaaraha uu sii kordhayo.
Dagaalka xoogiisa ayaa ka socda duleedyada magaalada, iyadoo ciidamada Somaliland ay isku dayayaan iney maquuniyaan xoogaga la dagaalamaya inkastoo iska caabin adag ay la kulmayaan
Somaliland ayaa sheegtay inay la dagaallamayso wax ay ugu yeertay argagixiso, hase yeeshee ciidamada deegaanka ayaa dhankooda sheegaya inay doonayaan inay dhulkooda ka saaraan ciidamo ay sheegeen inay ku soo duuleen.
Ugu yaraan 50 qof oo ay ku jiraan caruur haween iyo dad kale oo shacab ah ayaa inta la ogyahay lagu dilay dagaalka shanta maalmood ka socda Laascanood, waxaana ku dhaawacmay dad ku dhow 150 kale, welina ma jiraan calaamado muujinaya in dagaalku joogsanayo ama lagu kala adkaanayo.