Iyadoo sanadkii 1973-ki uu soo baxay filimkii Bollywood-ka ee Abhimaan, oo ay hogaamiyaal ka ahaayeen xiddigga Amitabh Bachchan oo ay Soomaalidu u taqaan Cali dheere iyo xaaskiisa Jaya, oo 50-sano jirsaday sanadkan, ayey BBC-du baaritaan ku sameysay soo jiidashada aan gaboobeyn iyo saameynta filimkan.
Amitabh Bachchan ayaa caan ku ah doorkii uu ku lahaa filinkii wiilka careysan ee Bollywoodka isaga oo wax ka jilay aflaam caan ah sida Deewar, Zanjeer iyo Sholay.
Laakiin qaar badan ayaa u arka Abhimaan oo loola jeedo (Qabweynan) – riwaayada muusiga ee ku saabsan jilicsanaanta cilaaqaadka aadanaha – inay ka mid yihiin doorkiisa ugu wanaagsan ee uu ka ciyaaro filimanta.
Jilaagan ayaa ku jilaya heesaa caan ah oo xaaskiisa cusub ku qanciya inay masraxa kula soo biirto, balse qabkiisa ayaa dhaawacmaya, Maseyr ayaana ka tan badinaya ka dib markii ay kaga fiicnaatay heesaha.
Agaasime Hrishikesh Mukherjee ayaa Bachchan ku lamaaneeyay xaaskiisa Jaya – lamaanahan waa ay is jeclaadeen waxayna is guursadeen hal bil ka hor inta aan la soo saarin filinkan – waxayna ku guuleysatay abaal marinta caanka ah ee Filmfare ee atirishada ugu wanaagsan.
Abhimaan oo nus qarni u dhameys tirmay bishii July ee sannadkii tagey ayaa muhiimad gaar ah ii leh – waa filimkii ugu horeeyay abid ee Bachchan ee aan arko walina ilaa maanta aan ugu jeclahay filimadiisa.
Waxuu ka mid ahaa in ka badan nus darsin filimaan uu Cali Dheere dhigayo oo la sii daayay sanadkaas. Liiskan waxaa ka mid ahaa Saudagar oo sanadkaas ahaa filimka rasmiga ah ee India usoo galay tartanka abaal marinta Oscar iyo Zanjeer oo u horseeday inuu Bachchan noqdo halyeyga Action-ka sare ee Hindiya.
Balse Saibal Chatterjee oo ah qoraa dhanka filimada ah ayaa BBC u sheegay in “Abhimaan uu ahaa filimka loogu hadal haynta badan yahay ee sanadka” iyo “soo saaristiisii ugu weyneyd sanadkaas”.
Taageerayaasha ayaa raxan raxan u soo booqday shineemooyinka, qoysas dhan oo ay ku jiraan waalidiin iyo caruur yar yar ayaa soo buux dhaafiyay tiyaatarrada, iyagoo buux dhaafiyay bandhigyada matinee iyo fiidkii.
Atariishada tiyaatarka, Monisha Bhaskar oo iyadu qiratay inay tahay “Taageeraha ugu weyn ee Bachchan” ayaa tiri “sheekada weligeed ah” ee ninka xaasidka ah ee aan ku faraxsanayn guusha xaaskiisa ayaa taabatay daawadayaasha “maxaa yeelay waxay ku qotontaa xaqiiqda”.
“Sheekada Abhimaan waxay ahayd mid la aamini karo sababtoo ah islaweynanku badanaa waxuu ka dhex dhacdaa lamaanaha, gaar ahaan bulshada sida Hindiya oo kale ah oo inta badan raggu aanay ku qanacsaneyn inay arkaan dumarkooda oo si fiican u shaqeynaya.”
Waxa la yaab leh,” ayay tiri, “isaga ayaa markii hore ku dhiirigeliyay inay heesto, balse hadana xamili waayey inay ka caansanaato iyada oo aan la tartamin isaga, kaliya waxay ahayd mid ka karti badan.”
Ms Bhaskar, oo afar jir ahayd markii waalidkeed u kaxeeyeen daawashada filimka markii laga sii daayay shaneemo Delhi ku taal ayaa dib u booqatay daawashada filimka dhowr jeer tan iyo markaas.
“Dabcan ma aanan fahmin markii ugu horeysay, laakiin waan ka helay muusiga iyo heesaha, marar badan ayaan daawaday tan iyo markaas, mar walbana waan sii jeclanayey,” ayay ii sheegtay.
Ms Bhaskar waxa ay ku tixgalisa in doorkani ka mid yahay “waxqabadyadii ugu wacnaa ee Bachchan” waxayna sheegtay in Jaya, oo ah xaaska dhibaataysan, ay ahayd “mid la aamini karo” iyo “mususiga oo ahaa mid cajiib ah heesuhuna waxay sii hor mariyeen sheekada”.
Sanadihii lasoo dhaafay, waxa uu Abhimaan ku kasbaday ammaan sare oo kaga imaaneysa taagerayaashisa, dhaleeceyn iyo saaxiibada Bachchan ee dhanka Filimada.
Filim sameeyaha Karan Johar ayaa ku tilmaamay filimkan “mid ka mid ah filimada aan jeclahay” wuxuuna sheegay inuu ooyo “mar kasta oo aan arko”. Dhowr sano ka hor, atariishada Vidya Balan ayaa qiratay inay daawatay “markii 9-aad” waxayna ku tilmaantay filim aan waqti lahayn. Bishii Disembar 2022, Bandhiga Filimada Caalamiga ah ee Kolkata ayaa filimkan ku bilowday.
Bachchan qudhiisa ayaa si wacan uga hadlay Abhimaan, isagoo ku tilmaamay inuu yahay “filimkii aniga iyo Jaya isu kaaya keenay, hal-abuurkii ugu xusuusta badnaa ee xirfaddeenna” wuxuuna sheegay in heesihiisa ay weli yihiin kuwo soo jiidasho leh oo riyo u ah qaar badan.
Mr Chatterjee waxa uu sheegay in Abhimaan had iyo jeer looga hadli doono inuu yahay “mid heer sare kaga jira” xirfadda Bachchan sababtoo ah wuxuu ahaa “filim aan loo samayn oo kaliya inuu ku habboon yahay qaabka ragga iyo xanaaqa dhalinyarada”.
“Tani waxay ahayd hal door muujiyay dhinac isaga ka duwan. Waxa uu ciyaaray halyey dhab ah, nin dhab ah kalsooni darro iyo hinaas. Waxa uu muujiyey inuu jilo karo kaalin walba oo loo qoro”