Dowladaha Soomaaliya & Talyaaniga ayaa ku heshiiyay in ay xoojiyaan xiriirka labada dhinac, Xukuumadda Roma ayaa dhiggeeda Muqdisho u ballanqaaday in ay ka gacansiineyso taageerada Militari, sugidda Amniga & la dagaalanka ‘AS’.
Madaxweynaha JFS Xasan Sheekh Maxamuud oo ay wehliyaan Wasiiro katirsan XFS ayaa kulan gaar ah la qaatay Wasiirka Gaashaandhigga Talyaaniga Guido Crosseto oo kawada hadleen xoojinta iskaashiga labada dhinac ah ee ka dhaxeeya labada waddan.
Sida lagu sheegay qoraal lagu daabacay Barta Villa Somalia, Madaxweynaha JFS Xasan Sheekh Maxamuud ayaa shaaciyay in Dowladdiisa ay ka go’an tahay sugidda amniga, soo afjaridda ‘AS’ & xoojinta dhismaha Ciidamada.
“Madaxweyne Xasan Sheekh Maxamuud ayaa adkeeyay muhiimadda in loo midoobo dabar-goynta kooxaha Argagixisada ah si loo xaqiijiyo duni nabdoon, horumarsan, caddaalad ah isla markaana si siman oo loo dhanyahay u wadaagta fursadaha jira” ayaa lagu yiri qoraalka Villa Somalia.
Madaxweynaha JFS Xasan Sheekh Maxamuud ayaa casumaad ka helay Madaxda Talyaaniga si ay uga wada hadlaan xoojinta xiriirka ka dhaxeeya labada Dal, waxaana dhinac socday kulan looga hadlay taageerada Militari ay u baahan tahay Soomaaliya.