Magaalada Muqdisho waxaa maanta lagu qabtay munaasabadda lagu daahfurayay Qorshaha Ka falcelinta Baahiya Bini’aadannimo ee Soomaaliya ee 2023, ayaa waxaa ka soo qeyb galay Ergeyga Madaxweynaha JFS ee Arrimaha Bini’aadannimada, Agaasimaha Hay’adda Gurmadka Qaranka iyo Wakiilka QM u qaabilsan Arrimaha Gargaarka.
Kulanka oo ka dhacay Airport Hotel oo ku yaala Gudaha Garoonka Caalamiga ah ee Aden Cabdulle ayaa madaxda ka soo qeyb galay kulanka ku lafa guray sida Soomaaliya uga bixi lahayd xaaladda ay ku jirto ee Bini’aadannimo.
Ergeyga Madaxweynaha JFS ee Arrimaha Bini’aadannimada Cabdiraxmaan Cabdishakuur Warsame oo ka hadlay kulanka ayaa yiri ”10 Sano kaddib iyada oo in ka badan 7 Bilyan oo Dollar ay baxday, maxay Soomaaliya u Wajaheysaa halista Abaarta? Dadka iyo dowladda Soomaaliyeed waxa ay Aaminsan yihiin in aan la rabin in ay isku filnaadaan”
Sannadka 2023, dad lugu qiyaasay 8.25 milyan oo qof, oo ku dhow kala bar dadka Soomaaliyeed ayaa u baahan caawinaad naf badbaadis ah oo degdeg ah. In ka badan 1.4 milyan oo qof ayaa guryahooda ka barakakacay si ay u helaan biyo, cunto iyo hab nololeed cusub.
Bayaan ka soo baxay Qaramada Midoobay ayaa lagu sheegay in laga cabsi qabo Macluul Bilaha Abriil iyo Juun ee sannadkan, haddii aan la joogteynin gargaarka bini’aadannimo, xilliroobaadka Gu-gana (Abriil-Juun 2023) uu noqdo mid hooseeya, sida ay saadaalintu haddaba muujineyso.