Ra’iisulwasaaraha Soomaaliya Xamse Cabdi Barre oo xalay shirgudoominayay shirkii aan caadiga aheyn ee golihiisa wasiiradda ayaa soo qaaday xaaladda magaalada Laascaanood, isagoo sheegay in ay arrintan wada hadal ka yeesheen Isaga, Madaxweyne Xasan, Ra’iisul Wasaare kuxigeenka & wasiirka arrimaha gudaha, ayna u arkayaan in ay tahay qadiyad u baahan xal in laga gaaro, siyaasadna ay lug ku leedahay.
Xamse, ma cadeynin mawqifkiisa qadiyadan kuwajahan, isagoo hadalka ku wareejiyey Raysalwasaare kuxigeenka Xukuumadda oo kasoo jeeda Somaliland, Saalax ayaa madasha ka sheegay in qadiyadu ay tahay mid u dhaxaysa dad kuwada jira nidaam ay dhisteen, sida uu sheegay wuxuu tilmaamay in aysan jirin beelo is-haya, balse ay siyaasad lug iyo saameyn ku leedahay, wuxuu sheegay in ay xooga saarayaan in la xaliyo.
Wasiirka Boostada iyo Isgaarsiinta Soomaaliya Jaamac Xasan Khaliif oo kasoo jeeda SSC, oo isna hadalka qaatay, inkasta oo bilowgii Xamse u diiday ayaa sheegay in dadka dhibaato loo geystay, ayna tahay in go’aan iyo mawqifka Xukuumadda madasha laga cadeeyo, isagoo la kulmay afcelin xoogan oo madasha ay uga soo jeediyeen wasiiradii fadhiyey ee kasoo jeeday Somaliland.
Wasiir kuxigeenka wasaaradda beeraha iyo waraabka Sahro Yuusuf Cige, oo kasoo jeeda Somaliland, ayaa madasha buuq iyo qeylo ka kicisay, iyadoo durtay hadaladii wasiirka Boostada iyo Isgaarsiinta oo ay sheegtay in uusan hadli karin, taas oo sababtay in shirka laga saaro.
Ra’iisulwasaare Xamse ayaa ugu dambeyn sheegay in ay qadiyadan u xilsaarayaan Wasiirka arrimaha gudaha Faderaalka Axmed Macalin Fiqi oo uu war kasoo saari doonto, isagoo ku adkeystay in ay tahay arrin siyaasadeed oo ku adag isaga