Waxaa sii kordhay khasaaraha ka dhashay dhul-gariir xooggan oo cabirkiisa lagu sheegay 7.8 Magnitude oo ku dhuftay waddamada xad-wadaagga ah ee Turkiga iyo Suuriya, Dadka dhintay ayaa kor u dhaafaya 4,000 oo ruux.
Yunus Sezer oo Madaxweynaha Turkiga u qaabilsan gargaarka & maareynta musiibooyinka ayaa sheegay in saacadba saacadda ka dambeysa la diiwaangelinayo tiro horleh oo sii kordhineysa diiwaankii la qoray.
2,921 qof ayuu sheegay in ay dhinteen inta la xaqiijiyay, halka ay dhaawacmeen 15,384 oo ruux waxaana ku burburay dhisma gaaraya 6,217, khasaaraha ayaa intaas ka badan kara balse marka xaaladdu dib ugu soo laabato sidii hore dib kasoo gudbin doonaan.
Diyaaradaha duulliye la’aanta ee lagu xiray kaamirooyinka casriga ah ayaa dul heehaabaya magaalooyinka dhul-gariirku dumiyay, waxa ay raadinayaan haddii ay helaan calaamado muujin kara in dhismaha dhulka galay lagu hoos jiro.
Dowlado dhowr ah ayaa gurmad degdeg ah u diray Turkiga waxaana kamid ah: Qatar, Mareykanka, Ingiriiska, Pakistan & waddamo kale oo gargaar noocyo kala duwan iyo kooxaha gurmadka degdega ah u diray si ay qayb uga qaataan baadi-goobka dadka maqan.
Dowladda Shiinaha ayaa ku dhawaaqday in $6 Milyan oo Doollar oo gargaar ah ay ugu deeqday Turkiga si loogu gacan qabto qoysaska ku guryo beelay dhul-gariirka ee la dejiyay guryaha macmalka ah ee Toondhada ah.
La soco wixii kasoo kordha.