Xildhibaan C/raxmaan C/shakuur Warsame oo katirsan Golaha Shacabka Soomaaliya ayaa si kulul ucambaareeyey dagaalka dib uga qarxay magaalada laascaanood oo ciidanka Soomaaliland iyo maleeshiyaadka dadka deegaanka udhaxeeya.
Wuxuu ku baaqay in dagaalka la joojiyo oo miiska wadahadalka lagu dhameeyo inta dadka la dhameyn lahaa,islmaarkaana la bad baadiyo dadka kale.
HOOS KA AKHRISO QORAALKA XILDHIBAAN C/RAXMAAN C/SHAKUUR
Waa ayaan darro iyo wax laga xumaado dagaalka Laascaano ka socda ee dhimashada, dhaawaca iyo burburka hanti sababay. Waxaan ku baaqayaa in colaadda degdeg loo joojiyo. Waxaan Alla uga baryayaa in uu dadkii ku dhintay naxariistiisa siiyo, kuwa ku dhaawacmayna caafiyo, kuwa hanti beelayna uu ciwad celiyo.
Arrin xalkeedu siyaasad yahay oo wadahadal iyo wada-xaajood u baahan, awood is maquunis irid ugama furna. Sida aan midnimada Soomaaliya awood sheegad lagu gaari karin, kala go’eedana xoog laguma keeni karo.
Dawlada Federaalka ah xil ayaa ka saaran ilaalinta madaxbannaanida, midnimada iyo wadajirka dhulka Soomaaliya.
Allaha dadkeenna gaarsiiyo xili uu caqligu caadhifada ka adagyahay, siyaasadda qaran ay tan haybta ah ka xoog badan tahay , qiyamka madaniga ahna ay kuwa qabiilka ka sareeyaan.