Guddoomiyaha Xisbiga Daldhis Dr Abdirahman Xuseen Adow ayaa yiri Waxa jira dad ku soo dhaawacmay qaraxyo iyo dagaal toos ah meelo kala duwan Gobolka Hiiraan, Sh. Dhexe iyo Galgaduud. Dhaawaca ayaa iskugu jira Macawisley iyo askarta dowladda.
Dadka ayaa qaba dhaawacayo kaladuwan kuwa naafo noqday iyo kuwo indhobeelay.
Dhaawaca ayaa jiifa Isbitaalo kala duwan ayaga oo qaarkood dalka waxba looga qaban karin sida ay sheegeen dhaqaatiirta.
Waxa kale oo jira in Isbitaalada ay u heystaan lacago rahan ah inta ay jiifeen Isbitaalada.
YAA KEENAY DHAAWACA ISBITAALADA?
Dhaawaca Isbitaalda waxa keenay dowlada oo u dirtay diyaarado, kadibna ma jirto cid xaalkooda hoose lasocotay oo ah dowladda ama Maamulka HirShabeelle.
Dad kala duwan oo u badan qaraabo oo Isbitaalada ku booqday dhaawaca ayaa ka soo sheegay in ay heysato darxumo iyo rajo xumo oo ah in aysan heysan ama helin daryeelkii ay mudnaayeen amaba aysan jirin cid ka warqabta ama u maqan.
YAA DAYACAY DHAAWACA?
Waxa jira masuuliyad wadareed oo ah DF. Maamulka HirShabeelle. Xildhibaanada heer Federaal, heer Dowlad Goboleed iyo Sanaterada oo habayaraatee aysan jirin qolo roolkoodu muuqdo.
MAXAA KA DHALAN KARA DAYACA DHAAWACA:
Sida cad kacdoonkii ka bilaawday Gobolka Hiiraan, go’aankii Mudane Madaxweyne XSM oo dalka oo dhan ku faafay, lagana gaaray guulo waaweyn ayaa u muuqda mid la gacan bidxeynayo ayida oo loogutalagalay ama in masuuliyad layska saarin. Xaalkan ayaa sabab u noqon kara in Ciidanka Macawisleyda iyo askarta ay tusaale u noqdaan dhaawaca lagu dayacay isbitaalada oo aan helin daryeel caafimaad iyo midka qoyskooda.
Arrinkan ayaa xagal daacin kara halganka Khawaariijta dalka looga xoreynayo iyo dadaalka Madaxweyne Mudane XSM, waayo waa sawir aad u fool xun oo laga dheehan karro masuuliyiinta kala duwan in keliya daneynayaan qof caafimaadqaba.
Dowladnimada waxa lagu qeymeeyo oo ugu horeysa waxa weeye sida ula dhaqmaan Bukaanka iyo Maxaabiista.
BAAQ DEG DEG AH:
Waxa loogu baaqayaa Xukuumada Federaalka, gaar ahaan Wasraadda caafimaadka, Amniga iyo Gaashaandhiga, Madaxda HirShabeelle, Xildhibaanada heer federaal sanaterada in si deg deg ah wax looga qabto xaalka Dhaawaca Isbitaalada Muqdisho.