Dhacdo dil ah ayaa ka soo shaac baxday magaalada Nanded ee dalka Hindiya. Gabar 23 jir ah oo ka timid tuulada Pimpri Mahipal ee Nanded ayaa la dilay.
Gabadha dhinmatay magaceeda waxaa la yiraahdaa Shubhangi Jogdand. Waxa ay xidhiidh jacayl la yeelatay nin ka mid ah dhalinyaro tuulada waxaana tallaabadaas ka soo horjeestay qoyskeeda. Kadib qoyska ayaa dilay Shubhangi oo ay gubay meydkeeda.
Shubhangi, 23, waxa ay ahayd ardayad sannadka saddexaad oo dhiganaysay Machadka Ayurvedic ee Nanded. Waxa ay xiriir la yeelatay wiil dhalinyaro ah oo tuuladooda deggan laakiin reerkooda ma aqbalin.
Sidaa darteed, qoyska Shubhangi ayaa guurkeeda dhinaca kale qorsheey saddex bilood ka hor. Maalmo ka bacdi guurkii ay qorsheeyeen waa uu socon waayay waana lagu kala tagay sababo jira awgood. Tani waxay ka caraysiisay qoyska Shubhangi.
Habeennimadii Axadda ee aynu soo dhaafnay ayaa xubno qoyskeeda ah ay dileen oo meydkeeda ku gubeen beerta dhexdeeda, sababta oo ah sheekada gabadha ayaa tuulada qabsatay waxayna dareemeen ceeb. Dambaskeedii ayaa la raaciyay tog Meesha marayay.
Waxaa jirtay dood ka dhacday tuulada Mahipal Pimpri oo ku saabsan maqnaanshaha Shubhangi saddex maalmood oo aysan la joogin qaraabadeeda.
Qaar ka mid ah muwaadiniinta tuulada ayaa Khamiistii, oo ku beegnayd Janaayo 26-kii ku wargeliyay Saldhigga Booliska Limbgaon.
Markii ay si qarsoodi ah u baareen, waxaa soo baxday in waalidiinta Shubhangi ay dileen gabadhooda iyagoo gacan ka helaya adeerkeed, iyo labadiisa wiil.
Booliska magaalada Limbgaon ayaa gacanta ku dhigay labada eedeysane ee dilka lagu eedeeyay. Thanedar Chandrakant Pawar oo ah taliyaha Saldhigga Booliska Limbgaon ayaa sheegay in dilkan ay ku lug leeyihiin shan eedeysane, islamarkaana baadigoobka saddexda kale uu socdo.
“Intii ay boolisku su’aalaha weydiinayeen waxay qoykeeda qirteen in gabadha ay xiriir la sameysay nin dhallinyaro ah, taasina ay sababtay in guurkeeda uu burburo, oo sumcad-darro usoo jiidday qoyska, markaas ayey ceejiyeen oo ay dileen, kaddibna way gubeen oo dambaskeeda ayay raaciyeen webiga, qoyska gabadha ayaa sidaas qirtay.”
“Booliska ayaa arkay meelaha dambaska laga helay. Haraageeda qaar ayaa sidoo kale laga helay wabiga. Waxaa loo diray sheeybaarka si loo baaro hidda sidaha. Baaritaan dheeraad ah ayaa socda,” ayuu yiri taliyaha.